Matalena

Matalena nun teneva niente, ‘o destino niente ll’aveva rialàto. 

Essa faticava ‘ncasa ‘e possidente, e p’’e servizie suojo era pavata. 

 Ma Matalena era bbona ‘e còre, era ‘nu dono nato ‘nzieme a essa. 

Era ‘a cchiù grossa ‘e sette sòre... e c’’a vita era fatta ‘na scummessa. 

 ‘O Pataterno ll’era data ‘ndote, ‘nu petturale fatto a mmonumento. 

Ô posto d’’e mammelle erano ròte.. e rialava latte a ògne mumento. 

 Nun c’era criaturo dint’ô quartiere, ca nun aveva zucato ‘a chelli zizze. 

‘Stu fatto nun ‘o ffaceva pe mestiere, salvava ‘e criature d’’e scapizze. 

 Matalena nun era juta â scola, ll’intelligenza, no, nun le mancava. 

Abbastava ca senteva ‘na parola... e ‘o criaturo ‘a zizza ‘mmocca se truvava.