'A 'mbrugliata (Eduardo De Filippo)

Pure tu te si’ ‘mbrugliato mmiez”o ‘mbruoglio ‘e sti ‘mbrugliune, cu ‘sta vita ‘mbriacata cchiù ‘mbriaca d”e ‘mbriacune; cu ‘o pensiero arravugliato ca cchiù sta cchiù s’arravoglia, e chi aspetta ca se sbroglia ‘ave voglia d’aspettà!… Primma invece a tempo antico, ‘a matassa se sbrugliava, pecché, tanno, ‘o cchiù scetato te sapeva arravuglià. Mo se scetano matina tuttequante e ‘o ‘mbruglione; sta sicuro, nunn”o truove, nun se vede: sta ‘mmiscato mmiez”o ‘mbruoglio d”a ‘mbrugliata.