PEDRO.

Cammina sulo Pedro mmiez' 'a via, 
cammina senza meta e senza forze, 
dint' a chill'uocchie bbelle 'a nustalgia, 
'na lacremella scenne e nun se smorza. 

 Nu tuozzo 'e pane tuosto pe' cumpagno, 
'a famma fa' rummore dint' 'a panza... 
'A crudeltà da' gente lascia 'o segno, 
nun tene core 'mpietto, ne' crianza! 

 Era bellillo assaje quacche anno fa', 
quanno scigliuto fuje fra tanti pare, 
purtato a' casa 'mbraccio da papà, 
cercava 'na carezza e forse...ammore! 

 Comme si fosse 'na pazziella viva, 
straziato dint' 'e mmane 'e duje criature, 
chello c' aveva fa' nunn' 'o ccapeva, 
ll'avevano spurcato cu 'e culure. 

 Po' s'è truvato viecchio e malandato, 
jettato comme fosse nu scarpone, 
senza rimorso l'hanno abbandunato, 
mo' dorme 'int' a nu scatolo 'e cartone. 

 'O cane... tene 'mpietto e sentimente, 
e nun se po'..nun s' 'a dda abbanduna'! 
Stanotte Pedro è muorto 'e famme, 'e stiente... 
Ha cunusciuto....sulo 'a 'nfamita'!