Nun è overo - di Pasquale Ruocco -Recitano Lina Sastri e Roberto Murolo

(¯`*•.¸Momenti di VITA¸.•*´¯)
https://www.facebook.com/groups/227092510835355/

Nun è overo - di Pasquale Ruocco -Recitano Lina Sastri e Roberto Murolo

Nun è overo

No, nun ‘e state a sentere ‘e ccanzone!
Chistu mare è celeste, 'o cielo è d'oro,
ma 'stu paese nun è sempe allero.
Nun sponta sempe ‘a luna a Marechiaro
e nun se canta e se fa sempe ammore;
cheste so’ fantasie p' 'e furastiere.
Si vuie vulite bene a 'stu paese,
fermateve 'nu poco dint’ ’e viche,
guardate dint' ’e vasce e fore e' chiese.
Venite, assieme a me, p’ ’e strate antiche,
invece ‘e cammenà vicino o' mare,
parlate cu chi soffre e chi fatica.
Quanta malincunia p’ ’e case scure
addò nun trase 'st' aria 'e primavera!
Guardate quanta sante attuorno e' mmura!
'Sta gente puverella crede a Dio,
patisce rassegnata e pare allera:
e chi è cecato canta "O sole mio".
N'hanno chiagnute lacreme ll'artiste:
e quante ne so' muorte int' o' spitale!
'Stu paese d' 'o sole comme è triste!
Io veco comm’ a n'ombra a ogne puntone
e penzo 'a gente ca lle manca 'o ppane…
Quanta buscie ca diceno 'e ccanzone...!