Venneva 'e sigarette 'e contrabbando,
purtava appriesso a isso a "Carolina",
Deve primma 'n' occhiata attuorno quando,
piazzava 'a bancarella ogni matina!
Spisse 'o truvave all'angolo 'e 'na via,
a ddo' ce steva 'a ggente "altolocata"...
'O cane lle' faceva cumpagnia
senza se lamentà...tutt' 'a jurnata!
Comme a nu monumento Nazionale,
steve ore e ore fermo...'a faccia 'e cera...
'E vvote se liggeva nu giurnale,
e po' s'arretirava a tarda sera!
Si aveva fatto sorde, era nu rre...
Diceva: Caruli' n'è valsa 'a pena,
dimane stamme a casa piccere'...
Facimme colazione, pranzo e cena!
Puteva tene' circa sittant'anne...
Ma s' 'e purtava overo egregiamente,
nu laccettino d'oro appiso 'nganne,
e 'na cagnata 'e panne sulamente!
Quanno vedeva 'o cielo a pecurelle,
o quacche schizzo d'acqua ll'arrivava...
Arricettava 'e corza 'a bancarella,
pigliava 'o cane 'n' braccio...e rincasava!
Michele e Carolina...'e vveco ancora...
Passeggiano 'int' 'a mente all'improvviso,
aunite sempe...proprio comm' 'e allora...
Mo'...so' famosi...pure 'n' Paraviso!
Nessun commento:
Posta un commento