'O MARE 'E NOTTE...

'O mare 'e notte è comme a 'nu criaturo, ca' s'arreposa doppo c' ha pazziato... E quanno chianu chiane se fa' scuro, pur' isso comme 'a lloro s'è calmato! 

 Dint' 'o silenzio d'oro d' 'a nuttata, ll'acqua se move appena, doce ...doce... Sotto a 'stu cielo maggico e affatato, 'o mare parla...e io...ne sento 'a voce! 

 E ppo' me fa' senti' 'o respiro lento, e ll'onne quanno passano brillanno, sotto 'o riflesso 'e chesta Luna argiento, ca' 'e gguarda tutt' 'o tiempo suspiranno! 

 Pur' io, ca' osservo chesta meraviglia, rummango senza sciato ,so' 'ncantata... 'O mare 'e notte 'o core mio se piglia... Comme si' fosse 'o primmo 'nnammurato!