'A vera 'nnammurata

Si vuie vedite ‘a ‘nnammurata mia, appena che ‘a vedite, ve ‘ncantate: semplice e bella, e sempe ‘nnammurata ‘e me sultanto, sulamente ‘e me! Comm’è felice quanno è ghiuorno ‘e festa e i’ resto ‘nzieme a essa dint”a casa; nun vo’ ca esco; e trova ciente scuse pe’ dirme: -Vuò veni’ a prega’ cu mme?- E dint”a Chiesia, mentre prega a Dio, essa nun chiagne. E pare ca preganno penzasse a me, ca zitto ‘a sto guardanno. E quase me fa chiagnere essa a me. ‘Sta ‘nnammurata mia, semplice e cara, è ‘a vera ‘nnammurata, è ‘a cchiù sincera; sultanto cu ‘nu vaso, quanno è ‘a sera, me fa sentì ched’è ‘a felicità! ‘Sta ‘nnammurata mia ch’è accussì bella, ‘sta femmena ch’è tutta gelusia, tene ‘e capille grigge, è vicchiarella; insomma mo vv”o dico: « È mamma mia!»