‘O sabbato d’’o villaggio - G. Leopardi.

 'A figliulélla vene d''a campagna 'int’â calata 'e sole, cu ‘o fascio d’evera, e porta 'mmano 'nu mazzo 'e rose e vviole pecchè comme ogne vvota se pripara ‘a guarnì dimane, 'o juorno 'e festa, pietto e ccapille. 

 Sta assettata cu 'e vvicine, 'ncopp'â scala a ffilà, 'a vicchiarella, vutata a llà, addò se perde 'o juorno e sta cuntanno d''e tiempe belle suoje quanno int'ê juorne 'e festa se priparava, chiena ‘e salute e bbella, e abballava â sera, 'mmiez’ a cchille ch'erano 'e cumpagne ‘e ll’età cchiù bbella. 

 Già ll’aria se fa scura torna celeste 'o cielo, tornano ll'ombre 'a copp'ê titte e ‘e cculline, d'int'ô jancore d''a luna appena nata mo ‘na campana annunzia ca ‘a festa sta venenno ‘e a cchllu suono siente ca ‘o core se cunforta. 

 ‘E ccriature alluccanno a cchiorme ‘ncopp’ô llargo, ccà e llà zumpanno fanno n’alleru rummore, e intanto torna lento verzo 'a casa fischianno ‘o zappatore, e penza tra sé e sé ô juorno c’arreposa. 

 Po quanno attuorno se smorza ogn’ata luce e tutto è ‘nu silenzio, siente ‘o martiello ‘e vattere, siente ‘a serra d’’o masterascio ca veglia ‘int’â puteca ‘nchiusa, sott’â lucerna, corre e se da da fà pe cunzignà ‘a fatica primma ca schiara juorno. 

 ‘E tutt’'e ssette chisto è ‘o cchiù bbellu juorno, chino ‘e speranza e ggioia, dimane ‘nfado e tristezza portano ll’ore, e â solita fatica ognuno torna cu ‘o penziero suojo. 

 Guaglione pazzariello, ‘sta ggiuventù è comm’a ‘nu juorno chino d’allerezza juorno chiaro, biato, primma d‘'a festa ‘e chesta vita toja. 

 Guodete, ninno mio, chistu mumento, bella staggione è cchesta. Nun te voglio dì ato, ma ‘a festa toja, pure si tarda a vvenì, nun te pesasse.