Notte napulitana

‘A luna stenne ‘na cupertella ‘e luce ‘ncopp’ 'o mare e ‘o mare 
s’arrècrea, arrecetta e luccechèa poi chiamma ‘ncielo ‘e stelle : 
Venite, favurite vuje site sempe ‘e cchiù gradite 
pecché ‘a notte vò’ ‘e cannele 
 pe’ fà luce ’nzieme ‘a luna 
e chi ‘e conta ad una ad una 
o è ‘nu pesce ‘nzunnecchiato 
o è ‘nu core ‘nnammurato. 
E ‘o Vesuvio ca’ se fruscia 
alliccato dint’ ‘a marina s’ha stipato 
‘a meglia stella pe’ brillà fino ‘a matina. 
Nu’ lampione rusicanno chin’ 
‘e scuorno vire ‘e stelle ‘nzieme a luna 
se vuleva levà ‘a tuorno, poi ce pienza…
e poco primma ‘e se stuta’ và alluccanno : 
ma vattè’ chi se ne fotte cumme a vuje 
anch’io ogni notte tengo chesta bella ciorta: 
‘e fa’ luce a ‘sta città!