BELLA CA NUN SAIE LEGGERE (L. Bovio - N. Valente)

BELLA CA NUN SAIE LEGGERE

(L. Bovio - N. Valente)

Nammuratella mia doce e 'nnucente,
te voglio comme sì, bella e 'gnurante;
uommene 'e penna ne canosco tante,
ma i' 'mmirio sulo a te ca nun sai niente:
ca si t'affacce a la fenesta e cante,
si 'o cielo luce, se fa cchiù lucente.

Bella ca nun sai leggere,
tu liegge 'int' a 'stu core
forse a cchiù bella pagina
ch'è 'a pagina 'e 'st'ammore...
E Ammore mio è nu libro culor rosa,
ca tu me l'ê stampato cu nu vaso.

I' te trascuro e tu nun dici niente,
ma lacreme ne chiagne tante e tante...
M'aspiette 'a sera miezo Piazza Dante
cu ll'uocchie russe e surridente;
ma pe' timore d'essere seccante,
povero Ammore, chiagne alleramente.

Bella ca nun sai leggere,
tu liegge 'int' a 'stu core
forse a cchiù bella pagina
ch'è 'a pagina 'e 'st'ammore.
E Ammore mio è nu libro culor rosa,
ca tu me l'ê stampato cu nu vaso.

Scienzia nun tiene, ma 'e vvirtù so' tante
ca si' 'na gioia pe' chi te tene mente;
tu si' 'na sartulella, io nu studente,
ma quanta cose m'ê 'mparato, e quante!
Ca tutto se po' di', senza di' niente,
ma l'ê 'mparato tu ca si' 'gnurante.

Bella ca nun sai leggere,
tu liegge 'int' a 'stu core
forse a cchiù bella pagina
ch'è 'a pagina 'e 'st'ammore...
E Ammore mio è nu libro culor rosa,
ca tu me l'ê stampato cu nu vaso.