Sera d’estate e passiata p’‘a Caracciolo...

Sera d’estate e passiata p’‘a Caracciolo me fermaie a sentì addora d’‘o mare a sentì ‘a brezza marina ca m’accarezzava ‘a faccia ‘o mare sbattenno me regneva ‘e pulmune ‘e sale 

 Quanno sì bella pensaie, guardannola m’amariggiaie penzaie a quanta luce, quanta gloria, è passata ‘a ccà me fermaie n’attimo, chiudetto l’uocchie e penzannola dicette: Napule mia tu sì ‘a cchiù bella, dimme, pecché te fanno accussì male 

 Quanno cammino pe stì strade se sente addora ‘e mare ‘o Vesuvio chianu. chianu scenne ncoppa ‘a rena e se sposa cu l’acqua blu pittanno nu quadro ‘e Pataterno culure maie visti fanno parte ‘e sta tela, stì culure ‘e ttieni sulo tu 

 E allora m’addimanno, ma pecché? 
Pecché te sporcano ‘a faccia? 
Pecché te trattano male? 
Pecchè te fanno… 

 Mentre pensavo l’urdemo pecché sentetto ‘a vocia soia… ‘a voce ‘e Napule… Figlio mio, nun t’amariggià nun vide so’ tant’anne che soffro ‘e chiagne però sto sempe ccà 

 Chello ca me fanno tanta frate tuoie è brutte assaie me fa male, me da dulore, me fa spantecà però che po’ dicere na mamma? 

Na mamma abbraccia ‘e figlie, tutt’‘e figlie suoie 
 Bravi, brutti, belli e piccerille, figli nsisti, figli bbuono, figli curtulilli tutt’’e figlie me so figli e io voglio bene a tutti quanti pure ‘e figli ‘e zoccola ca me fanno male 

 Quanta figli so passati e quanti passarranno cammurristi, poliziotti, giudici e mariuoli miedeche, nfermiere, prievete e puttane cantanti, masti d’ascia, poeti e avvocati chi se sente garibaldino e chi brigante sudditi, rignanti, Masaniello e Maradona. 

 Tutti so asciuti ‘a chesta panza tutti hanno pigliato chestu llatte e chilli ca me sporcano ‘a faccia forze nu juorno cagnarranno io l’aspetto tutt’’e sere ca veneno a me vasà speranno ca nun me vonno cchiù ngannà.