Povera terra mia che t’hanno fatto?

Quanta turmiente, quanta ricorde ca te puorte dint’ ‘o core quanta guerre, ancora ne siente ‘e lamiente quanta vote allucca e chiagne po’ dulore 
 Povera terra mia che t’hanno fatto? 
 T’hanno arrubbato tutte ‘e ricchezze t’hanno arrubbato tutte ‘e bellezze t’hanno ncantata, quanta storie t’hanno raccuntato 
 Cchiù ‘e cient’anne ‘e buscie ‘e chi primma t’ha invaso, e po’ t’ha lassato comm’ a ‘na criatura sola, abbandunata e spugliata e se n’è gghiuto senza manco darte nu vaso 
 Quanto tiempo è passato ‘a quanno ire splennente, ‘a quanno ire ‘a cchiù bella tu, paraviso e terra ‘e mille cunquiste tutte vulevano sta ccà, tanto ca mo nun saie ancora chi t’ hadda cummannà 
 Terra ‘e sale, lava, e tanta culure terra ‘e sole, arena, e tanta dulure terra ‘e musica, tammorra e camorra terra ‘e munnezza, tarantelle e putecarelle terra ‘e sinnece , guappe e canzuncelle 
 Napule sì tu, 
Napule songh’io tutte quante simmo 
Napule chi a vò bbene e chi ‘a vò male pirciò ve chiedo a tutte quante ‘e guardà chesta città ‘e vulerla bene, da accarezzà levammoce ‘sti pacchere, facimmola campà… 
 Napule offesa, sporca, denigrata 
 Napule splennente, bella, onorata 
 Napule maltrattata, nguaiata, abbandunata 
Napule ca lotta, ca chiagne ca ride 
 Napule ‘a voglio accussì, pulita, allera e vincente e sulo accussì 
Napule mia, sarraie ancora ‘a cchiù bella….