NAPULE E' MIA...

NAPULE E' MIA QUANNO NU RAGGIO 'E SOLE 'A MATINA ME PORTA 'O BLU D' 'O MARE, M'ARAPE LL'UOCCHIE SENZA DI' PAROLE CU 'NA CAREZZA D' 'O VIENTO D'APRILE, FRISCO, MANCO VENESSE 'A NU CELLARO. NAPULE E' MIA SI 'E NOTTE 'A LUNA CHIENA P' 'A CARACCIOLA DICE A 'E NNAMMURATE: "I' STONGO CCA P'ALLUMMA' TUTT' 'A SCENA! A CHE SERVO SI PO' NUN VE VASATE?" NAPULE E' MIA QUANNO SOTTO NATALE, SAGLIENNO DINT' 'O VICO D' 'E PASTURE SOTT' 'A PIOGGIA 'E CULURE D''E BIANCALE TE SPIECCHIE DINT' 'O SGUARDO D''E CRIATURE CA SCRUTENO INT' 'A GROTTA D''O BAMBINO, MENTRE 'E VIECCHIE SE MAGNANO CU LL'UOCCHIE 'A FRUTTA 'A DINT' 'E SPORTE D' 'E PARULANE SCURDANNESE CH' E' TUTTA TERRACOTTA! MA...NAPULE E' 'A MIA PURE QUANNO 'A CAMORRA SPORCA C' 'O SANGO 'E STRADE 'E 'STA CITTA', CAMPANNO 'NCOPP' 'E SPALLE 'E CHI FATICA, DISPREZZANNO CHI VIVE CU' ONESTA. NAPULE E' SEMPE 'A MIA QUANNO 'A MUNNEZZA E' 'NA CURNICE 'E SCUORNO PE' 'STA GENTE NATA MMIEZO A MILLE DIFFICOLTA', CA CUMBATTE P'AVE' CHISTU DIRITTO: 'E CAMMENA' PUTENNO RISPIRA'. NAPULE E' 'A MIA SI PURE NU GUAGLIONE LASSANNO 'A SCOLA MMIEZO 'A STRADA VA, SCIPPANNO 'A ROBBA D'ORO 'A CUOLL' 'A GENTE PE SE FA' 'E SORDE CA S'ADDA DROGA'. NAPULE TU SI' MIA! PE' MME SI' MAMMA! PURE SI CIENTO SBAGLIE TU PUO' FFA! MA 'NA MAMMA CA SBAGLIA E' SEMPE MAMMA! E CIENTO VOTE T'AGGIA PERDUNA'!!