'NA PRIERA

 'Mmiezo â ‘na striscia ‘e sole chiena ‘e polvere, dint’ ‘na chiesa addò ce va a prjà sulo chi vuole, annanze ‘na mieza cannela accesa sotto ‘a statua ‘e ‘na Maronna scagnata ‘e culore e addulurata, se sentiva venì ‘na voce ‘e donna, ca prjava, mmane giunte e ‘ndunucchiata. 
Cu ‘nu lamiento ‘e sufferenza essa spiava ‘a Maronna ‘nfaccia e ce faceva, comme ‘ncunfidenza, ‘na specie ‘e rimustranza … ‘na partaccia: “ Te crire ca tu sulo si ‘na mamma? Pur’ì comm’a tte tengo ‘nu figlio, è overo c’hai sgravato int’ ‘a capanna ma a me nunn è jiuto assaje cchiù meglio! 
Tengo ‘sta criatura piccerella senza ‘nu pate ca m’ha lassato, ‘o ‘nfame, n’aggio strusciato scale e scalettelle pe’ me poté abbuscà ‘nu piezzo ‘e pane! Mo’, Tu ca staje ‘mParaviso assettata ‘mmiezo Angele e Sante faje circulà a voce ‘e chest’avviso fatte sentì bbuono ‘a tutte quante… Dincelle ca m’aiutassero ‘nu poco Pecchè, quaggiù, nun se po’ cchiù campà dincelle ca s’affacciassero, ‘e vvi lloco, menassero ‘nu muorzo ‘e bbene pure ccà! 
Tu si ‘a Maronna e t’hanno dà aurienza, famme ‘o favore parla comme saje, ì so’ disposta a ffà ‘na penitenza, e so’ secura: ‘na mano tu m‘a ddaje. 
‘A luce addivenette cchiù lucente ‘a polvere sparette ‘a rint’ ê ragge, pure ‘a Maronna pareva cchiù splendente, e, a donna, 'ncore sujo, pigliaje curaggio …!