QUANNO ‘A DONNA DICE “NO”

C’è ‘na parola che ‘a sape ‘ntènnere sulo ‘a donna, ‘na parolella corta addò la o nunn è maje tonna, ca fa penzà ca la resposta è tosta ed anniativa, ca ‘sta parola è senza arremmèdio e spicciativa. 
E’ ‘na parola ca pare ca dice ch’è ‘nzerrata ‘a porta ma ‘a stessa po’ dicere c’’a speranza nun è morta, pare nu pàcchero ma,’e vote, sape ‘e ‘na carezza, ovèro è tosta ma sape pure annasconnere ‘a durezza. 
L’ommo azzardante è accuorto ad apprezzà l’essenza ’e nu “no” ca po’ dicere ”Te voglio”o ch’è spartenza, nu doje de picche acalato o è accunniscennenza. 
Una parola,doje facce, è sulo ‘o tono ca fa la differenza.