Angele a schiera pittano ‘o tramonto
mmiezo ‘e mille culure ‘e Margellina.
Nu pentagramma ‘e luce, na scugliera,
e Villanova…scrive na canzona.
Voce ‘e Sirena sta chiammanno ‘a sera,
‘a sera chiamma e abbraccia na Sirena,
e ll’onna murmulea vierze d’ammore
sott”o cielo che a ppoco trasculora.
‘O sole chianu chiano scenne a mare
facenno d’oro ll’urdema paranza,
a’ una a’ una ‘e stelle nluntananza
ntallianno nun s’appicciano, nun schiara.
Se fa campagna ‘o mare chesta sera,
sapore ‘e grano, na carezza ‘e viento,
ll’ombra d”a notte, ll’aria ‘e primmavera
ntrecciano sciure… e so’ catene argiento.
Catene e sciure, uocchie ‘e poesia ‘e na femmena
scetano suonne antiche, doce e tiennere,
ca pe cantà nun servono ‘e pparole,
appicciano p”e vvie funtane ‘e sole!
Chitarre e vviole,l’oro d”e mmimose,
note ‘e nu pentagramma ‘e luce e rrose,
canzona nova e doce, sott”o monte
pitta int”a ll’uocchie l’eco d”o tramonto…
Nessun commento:
Posta un commento