Dint’ a n’appartamento all’urdemo piano ‘e Palazzo Sansevero, ca se trova a vico San Dummineco Maggiore a Napule, propio vicino â cchiesa, steva ‘e casa ‘o princepe ‘e Venosa, don Carlo Gesualdo, e ‘a mugliera, Maria d’Avalos. Chesta se la ntenneva cu Fabrizio Carafa, ‘o duca d’Andria, e ce la facette a ngannà a don Carlo fino a quanno nu zio ‘e isso, Giulio Gesualdo, ca teneva ‘a mmiria pecché nun ngarraje maie a farse amà ‘a Maria, nun dicette ‘e ccose comme stevene ô nepote, ca pe tramente lloro parlavene chill’autri dduje facevane ‘e fatte loro, e tutto ‘o popolo e nobbiltà nun putevane credere ca l’amante ‘o facevane curnuto dint’ ‘a casa soja e isso nun se ne accurgeva. Era ‘a notte d”o 18 uttombre mille cincuciento e nuvanta, e don Carlo, verde p”a rraggia, ascette fujenne dâ casa d”o zio, e turnaje a casa nzieme a cincuanta pariente, otto serviviture e ati quattuordece uommene armate comme testemmonio e comme aiuto: dint’ ‘a stanza ‘e lietto ce stevene tutt’ ‘e dduje cuccate, e allora Carlo Gesuardo e l’autre accidettene sia a Fabrizio sia a Maria a scuppettate e a curtellate, pe nguollo e nfaccia. Accidettene pure ‘o nennillo ‘e sette mise nato da chill’ammore clandestino, chiavann ‘a capa d”o piccerillo nfaccia ‘a na porta, a Fabrizio muribbunno le tagliajene ‘e palle e po vuttajene abbascio ncoppo ‘o scalone d”o palazzo a isso e a Maria. ‘O purtone ‘e Palazzo Sansevero rummanette apierto, accussì ogne perzona puteva vedè chilli muorte accise, e fuje appesa na scritta ca spiecava ca s’era cunzumato nu delitto d’onore. Doppo nu paro d’ore ‘e gguardie jettene a vedè ch’era succieso, e ngucciajene nu monaco pe tramente steva prufananno ‘e carne ‘e Maria: chist’ommo schifuso e pervertito fuje arrestato e mpiso p”o cuollo ‘o juorno appriesso mmiezo ‘a Piazza d”o Mercato

Doppo l’esequie fatte ‘e pressa ‘e pressa, ‘e servitore accuminciajene a sentì allucche e suspire pe tutto ‘o palazzo, ca rummanette sfitto all’urdemo piano pe nu decennio. ‘E notte ‘e luna chiena, mmece, ‘e spirite ‘e Maria e Fabrizio vanno fujenno secutate ‘a autri spiriti, armati, e ‘e strille se ponno sentì pe tutta ‘a zona ‘e San Dummineco. Chisti fatte hanno purtate ‘a maledizione ncoppo ‘o palazzo, accussì ‘e siecule appriesso l’inquiline fin’ ‘a settima generazione nun putetteno truvà pace doppo ‘a morte. L’anno mille ottuciento e otto pigliaje casa llà don pasquale Del Pezzo, prufessore ‘e matematica ‘e l’Università ‘e Napule, câ mugliera soja svedese ca murette ‘e paura doppo visto ‘o spireto d”o pittore .Belisario Corenzio, ca stette ‘e casa llà pecché faticaje p”a famiglia Sansevero. A siconna mugliera d’o prufessore, pur’essa svedese, vedeva tutte chest’ombre e pure chella ‘e Raimondo di Sangro, ‘o leggennario princepe alchimista ‘e Sansevero, e ‘o prufessore stesso cuntava ca na vòta ncuntraje ‘o spireto ‘e na reincarnazione ‘e Raimondo: l’anno mille noveciento cincuanta e otto cierte studiuse napulitane facettene na seduta spiritica, e mmiezo all’ombre ce steva pure stu prufessore. Sempe tanno se sapette quale erane state ‘e reincarnazione ‘e don Raimondo, ca poche anne prima isso era turnato a nascere, propio a Napule.