Salvatore Di Giacomo ~ Luna nova

La luna nova 'ncopp' a lu mare 
Stenne 'na fascia d'argiento fino. 
Dint'a la varca lu marenaro 
Quase s'addorme cu 'a rezza 'nzino. 

 Nun durmì, scetate, oje marenà, 
Votta 'sta rezza, penza a vucà! 

 Dorme e suspira 'stu marenaro, 
Se sta sunnanno la 'nnammurata. 
Zitto e cujeto se sta lu mare, 
Pure la luna se nc'è 'ncantata. 

 Luna d'argiento, lass' 'o sunnà, 
Vasalo 'nfronte, nun 'o scetà! 
 Comm'a 'nu suonno de marenare, 
Tu duorme, Napule, viata a te! 

Duorme ma, 'nzuonno, llacreme amare, 
Tu chiagne, Napule, scetate, scè! 

Puozze 'na vota resuscità. Scetate, scè, Napule, Nà!