'NA PASSIGGIATA A NAPULE...

 'Na passiggiata a Napule, io me vulesse fa'... Partendo da Posillipo, tanto p'accummincià! Po' via Petrarca, 'o Vommero...scennesse chianu chiane... 
A piedi, senza sosta pe' 'na jurnata sana! 

 Sicuro me fermasse, abbascio Marechiare, addo' ce 'sta 'a fenesta c'affaccia 'ncopp' 'o mare... 
E vierze 'e 'na canzone l'hanno resa immortale, è 'na fenesta maggica, s'avverte ca' è speciale! 

 Che dire 'e via Caracciolo? 
Ce arrivasse 'int' 'a nuttata... 
'O lungomare è splendido, quanno sta' illuminato! 
Sultanto si ce penso, me piglia ll'emozione, se 'nfonneno chist' uocchie...so' llacreme 'e passione! 

Castel dell'Ovo, 'o Golfo, 'o Borgo Marenare... 
Stampasse dint' 'a mente ogni particolare! 
Lentamente, doce doce, senza pressa, a ppere a ppere... 
'Na passiggiata a Napule...
m' 'a facesse tutt' 'e ssere!