Peppino De Filippo: Austo

(¯`*•.¸Momenti di VITA¸.•*´¯)
https://www.facebook.com/groups/227092510835355/

Austo
È troppo ‘o calore
‘e ‘stu mese d’austo.
Io mò squaglio ‘e sudore,
me sento ‘e murì.
M’avoto e me giro
pe’ dint”e llenzole…
me manca ‘o respiro,
nun saccio che ffa’ !…
Nun trovo arricietto…
me soso, me cocco…
‘stu cavero ‘e lietto
nun pozzo suffrì…
Me stenno, m’arrogno,
me metto ‘ntravierzo,
ma è tanto ‘o bisogno
che sento ‘e fiatà!
Cammino p’ ‘a stanza,
m’assetto a’ pultrona,
cu ‘a sola speranza
‘e puté arrepusà…
Arapo ‘o balcone,
ma ‘st’ afa ‘e calore
‘e ‘stu sole lione
cchiù peggio mme fa…
Si mò se truvasse
cu mme Carmenella,
che sfizzio, che spasso,
si stesse cu mme!
Sudàssemo almeno
pe’ffa’quacche cosa…
Cu chisto ‘ntrattieno,
‘o calore che ffa ?…
Peppino De Filippo